ဇူလိုင် ၂၆ – ၂ဝ၂၅
KKO(VOM)
အရက်မူးပြီးလမ်း လမ်းလယ်ခေါင်ကနေ လမ်းလျှောက်လာသူအမျိုး သားတယောက်က YBS 133 ယာဉ်ကိုဝင်တိုက်မိပြီး နောက်ပြန်လဲကျကာ ဦးခေါင်းပွင့်ဒဏ်ရာနဲ့ အခင်း ဖြစ်နေရာမှာ ပွဲချင်းပြီးသေဆုံးသွားခဲ့ရတဲ့ဖြစ်စဉ်တခု ရန်ကုန်မြို့၊ဒဂုံဆိပ်ကမ်းမြို့နယ်အတွင်းမှာ ဖြစ် ပွားခဲ့တယ်လို့ သိရပါတယ်။
အဲဒီဖြစ်စဉ်ဟာ ဇူလိုင် ၂၅ ရက်၊ညနေပိုင်းက ရန်ကုန်မြို့၊ယုဇနဥယျာဥ်မြို့တော်၊(၉၄) ရပ်ကွက်၊ကျွန်းရွှေဝါလမ်းမပေါ် မြသီတာပန်းခြံရှေ့မှာဖြစ်ပွားခဲ့တာလို့ နယ်မြေခံလူမှု့ကူညီရေးသမားတွေက ပြောပါတယ်။
“ပတ်ဝန်းကျင်ရဲ့ပြောစကားအရဆိုရင်ကားဆရာရဲ့အမှားတော့မဟုတ်ပါဘူး။ကားဆရာက လူကိုထိမှာဆိုးလို့ ဆွဲရှောင်တာလို့တောင်ပြောပါတယ်။လမ်းလျှောက်လာသူက ကားကိုတည့်တည့်ဝင်တိုးသလိုဖြစ်တာပေါ့နော်။ကားက လူကိုရှောင်ရင်းလမ်းဖက်တောင်ရောက်တယ် ပြောတယ်။ဒါကဘေးပတ်ဝန်း ကျင်ကပြောစကားအရသိရတာပေါ့။ကျွန်တော်တို့အဖွဲ့တွေရောက်သွားတော့လူနာ အသက်မရှိတော့ပါဘူး။ဦးခေါင်းထိခိုက်ဒဏ်ရာပေါ့၊နောက်စေ့ပွင့်ဒဏ်ရာနဲ့ပဲ အခင်းဖြစ်နေရာမှာဆုံးပါးသွားပါတယ်”လို့
နယ်မြေခံလူမှု့ကူညီရေးသမားတယောက်က VOM ကို ပြောပါတယ်။
YBS ယာဉ်နဲ့ မတော်တဆဖြစ်မိပြီး သေဆုံးသွားခဲ့သူမှာ အသက် ၅၂ နှစ်ဝန်းကျင်ရှိ ဦး….လုံခြုံရေး ဝန်ထမ်းအမျိုးသားတယောက်ဖြစ်ပြီး အခင်းဖြစ်နေရာတွင်ပင်သေဆုံးသွားခဲ့တာဖြစ်တယ်လို့ သိရပါတယ်။
သေဆုံးသူအမျိုးသားရဲ့Dead Body(DB)ကိုလည်း နယ်မြေခံလင်းပရဟိတကားနဲ့ မြောက်ဥက္ကလာပဆေးရုံသို့ ပို့ဆောင်ကူညီပေးခဲ့တယ်လို့လည်း လူမှုကူညီရေးသမားတွေက ပြောပါတယ်။
“မူးပြီးလမ်းလျှောက်လာသူနဲ့ YBS ယာဉ်တို့ တိုက်မိတာပါ။သူက ကားအောက်ဝင်သွားတာတို့ ကားဘီးနဲ့ ကြိတ်မိတာတို့တော့မရှိပါဘူး။လဲကျရင်း ဦးခေါင်းပွင့်သွားတယ်ပြောပါတယ်”လို့ ကူညီရေးသမားတယောက်က ဆက်ပြီး ပြောပြပါတယ်။
လက်ရှိမှာသေဆုံးသွားသူရဲ့မိသားစုဝင်တွေနဲ့ အဆက်အသွယ်ရရှိပြီဖြစ်တယ်လို့လည်း လူမှုကူညီရေးအသင်းတွေက ပြောပါတယ်။
“သေဆုံးသူရဲ့ မိသားစုဝင်တွေနဲ့လည်း အဆက်အသွယ်ရပါတယ်။မနေ့ကဆို အခင်းဖြစ်နေရာရဲ့ လမ်းမပေါ်မှာ ကျန်ရှိနေတဲ့ သွေးတွေကိုရေဆေးကြောတာတွေ သဲတွေနဲ့ ဖုံးတာတွေဒါတွေကို ကျွန်တော်တို့ ဆောင်ရွက်ပေးခဲ့ပါတယ်”လို့ ပရိဟိတသမားတယောက်က ထပ်လောင်းပြောပြခဲ့ပါတယ်။
Photo – ပိတောက်ကွေ့ လူမှုကူညီရေးအသင်း
